خبر وارئزدی گونشدن تالان اولموشدی! ؟
آیئن بئلی بوکولوب، یاپ کامان اولموشدی !؟
بو عالم ایچره نه وارسا، بونو بیلین بیرجه
ألم دوغولموشودو ، غم جوان اولموشدی
گیرنده کربُ بلایه علی(ع) اوغلو حسین (ع)
گوی اهلی سسلری یانمئش فغان اولموشدی
گئدنده گویلره سوسو سسی، سو سلطانی
فیکیر پوزونتی، حالیسه یامان اولموشدی
قورو چولده سوسوز کورپهلر نالهسی چون
سویون نیسگیلی درده سالان اولموشدی
قولون، نه سویلهییرهم!؟ قوللارئن وئرئب قوربان
گوتوردوگی سویو تورپاغه احسان اولموشدی
اومودو چون اوزولوب ساقینین میِ نابدان
جهان گوزو قاباغئندا دومان اولموشدی
بو درد باغرئنی سئخمئش، بو غمله اود توتموش
ایکی نرگیزی قان یاغدئران اولموشدی
گورنده قارداشی قارداش، قامتی سئندی
مگر حسین(ع) ایله عباس(ع) بیر جان اولموشدی!؟
بئلنچی داغ داغئلاندا یئرده بیل کی یقین
مَلک لرین حالی گویده پریشان اولموشدی
سوسوز جیرانئمئز نالهسی داها گلمیر
اینان بو جیرانی اوخلا وئران اولموشدی
قتیلگاهئن سوزونو آچمئرام امّا کاش
ناغئللار کیمی بو سوز یالان اولموشدی
آمان یوخویدی او چولده آمان یا ربّیم
اولوم آل نبییه(ص) آمان اولموشدی
اوزو قارا او گون ایچره گونش باتان واختی
حسین(ع) وای سسی بیر خوش اذان اولموشدی
سحر بورادا وارییدی گوللو بیر جنّت
اونون گوللری آخشام خزان اولموشدی
یانئخلی دردده ، باغری سئخان غم لرده
خانئم زینبی(س) کیمسه یوران اولموشدی
قئچئنا، قوللارئنا سلسله وئرئب دوشمن
دیلی دئییردی بئله حُرّزامان اولموشدی
شامئن خرابهلری بیرداها اولایدی خراب
اسیرلرین اورگی اوردا قان اولموشدی
بودورکی شیعه آلولی بیر اوددی تاریخده
صبیر قرارینی الدن آلان اولموشدی
ایکی دّری باسئب باغرئنا یوز ایللردی
بو دولتی اونا تکجه قالان اولموشدی
بیری رسول علیه السلام اولادی
ایکینجی حق سوزو نورلی قرآن اولموشدی
شعر از :سجاد حسینی
ارائه شده در کنگره شعر عاشورا- تبریز- دی ماه 87
